У Ваўкавыскім цэнтры культуры адбыўся святочны канцэрт, прысвечаны Дню народнага адзінства

17 верасня ў абноўленай зале Ваўкавыскага цэнтра культуры прадстаўнікоў раённай улады, працоўных калектываў, грамадскіх аб’яднанняў і актыўную моладзь сабраў канцэрт, прысвечаныДню народнага адзінства, які стаў сапраўдным сімвалам сілы нашага народа і аб’яднаўцэлыя пакаленні.

З дзяржаўным святам прысутных у зале павіншаваў член Савета Рэспублікі Нацыянальнага сходу Рэспублікі Беларусь, старшыня Ваўкавыскага райвыканкама Дзмітрый Захарчук.

— Ад усяго сэрца віншую вас з дзяржаўным святам — Днём народнага адзінства! Гэтае свята падкрэслівае пераемнасць пакаленняў, непахіснасць і самадастатковасць беларускай нацыі і дзяржаўнасці. Яно спалучае ў сабе трыумф гістарычнай справядлівасці і цвёрдую ўпэўненасць у будучыні нашай агульнай Радзімы. Сёння Рэспубліка Беларусь — гэта краіна, якая ў многіх выклікае зайздрасць. Мы захавалі нашы прадпрыемствы, якія стабільна працуюць, нашу прадуцыю ведаюць ва ўсіх кутках свету, мы поўнасцю забяспечваем сябе харчаваннем і пастаўляем яго за мяжу. Мы будуем жыллё, дарогі, бальніцы, школы, спартыўныя аб’екты. Мы жывём у спакойнай краіне, дзе ў кожнага ёсць усе магчымасці для самарэалізацыі, дзе кожны чалавек абаронены законам, дзе ўсё, што створана, працуе на чалавека. Захаваць і прымножыць нашы поспехі мы зможам толькі, калі будзем адзіныя, як былі адзіныя нашы продкі, якія баранілі ў цяжкія часы сваю зямлю ад ворага, і даказалі гэта. Адзінства — гэта магутная непераадольная сіла. Давайце разам рабіць нашу краіну лепшай, багацейшай, мацнейшай. Жадаю вам моцнага здароўя, дабрабыту і мірнага неба над галавой. Няхай у вашых дамах пануюць узаемаразуменне і згода, — сказаў Дзмітрый Іванавіч.

Затым мерапрыемства прадоўжылася выступленнямі творчых калектываў і артыстаў Ваўкавыскага раёна.